Llaqtaypiqa ñawpaqtaqa puririna, sipaspa taytanpa mamanpa wasintam rina, chaymanmi kukata, tantata, aychata apana chayniyuqmi purinan qaripa taytamaman.
Chayrayku qari wawayuq ñisutam ñakarin warmipa taytamamam ayllunkuna mana munakuq churakutin chayna kaptin achka kutikama rinanku wasinta. Warmipa taytamaman munatinmi chayña qaripa taytamamankunawan allinta rimanku, haykaqsi urqunqaku chaykunata, chaypi rimanku.
Chaymantaqa urquq rinapaqmi qaripa taytan chaynallataq mamay achka qullqita churanku, paykuna upyanakunata rantinku, achka frutakunata apanankupaq quñunku chaymantataq ayllunkunaman wiyarin rinsinampaq. Apanku qipipi, caballupi, asnupi chaykunata qipichinku. Warmi urquq rinnapaqa tutam rina mana punchawchu. Qaripa taytamamankuna warmipa wasinwan chayaspanku, chaypiqa ñawpaqta rimanku. Hinaspa rimayta tukuspankum pampapi qunqurichinku qarita warmitawan, qarita maqanku, payqa riki chaskikullan, chaypaqchá warmi churinta munan riki. Qarita tapurinku allintachu tiyanqa wasinpi chay warminwan kuskayarukuspanku nispa. Sichus mana allinta tiyanqa chayqa wanachisqaykiku nispa niykunku qaritaqa.
Chayman warmita tapunku pachayki kanchu, awayta yachankichu, allintachu waykukunki nispa. Chaypis qalachata warmipa pachanta huñuykapunku, hinaspa pachanta churapunku qipinman. Mana churapuptinku hinaqa, mana allinchu. Ichaqa manam taytamamanpa wasinpiqa imapas qipananchu warmipa kaqninkunaqa.
Hinaspa tuta warmitaqa urqupunku, warmitaqa pusapunku, apakapunku kusisqa qaripa ayllunkuna takistinmi apanku.
Qaripa wasin chaykama takistin apanku warmitaqa, chaynaqa kuskata puñuchinku warmita qaritawan. Qaripa wasinman chayachinku, chay warmi urqusqata, chaymantataq achikllamutin warmi qatarispa yanun mikunata kuyakusqanpaq chaymanta kuyakusqanpa taytamamankunapaq sapayanmi yanunan. Chaysi qaripa maman warmita qawanku atinchus icha manachus yanukuyta.
Qaritapas warmipa taytan llankachin tukuy ruwaykunapi chaytaq qawan atinchus icha manachus llankayta chaysi qiwata rutuchin, hatun rumikunata tanqachimun, papakunata tarpuchin. Ichaqa mana atiptin nin imataq kay micha qari, aswan warmi warmanta wischupuy nispa nin.
WALLPA QUWI TIYACHIY
Qari wawayuymi wallpa quwita tiyachinan warmipa taytanman chaymantataq mamanman. Tiyachinanpaqmi apanku warmipa wasinman qaripa ayllunkuna aychata wakin apanku chawapi wakinñataqmi apanku yanusqataña chaytaq iskay quwita, iskay wallpata nakan hinaspa sumaqta yanunku papa pikantiyuqta qankayuqta, mikunataqa quñillata apanku warmipa wasinman, upyanakunatapas apanku. Wasinman chayaspanku rimarinku chaymanta tiyachipunku sumaqta. Qaripa warmipa taytamamankuna ayllunkuna rimanku allin kawsanankupaq.
KASARAKUY
Chaymantataq warmi qari kuyakusqanwan tiyasqankumanta kasarakuyman yaykunku chaypaqmi ayllunkunaman willarin ruwaykunapi yanapananpaq, warmikunañaqmi mikuna yanuypi, qarikunañataqmi ramara nisqanta ruwanankupaq. Kasarakuqkunam marqaqninkuta maskanku allin kawsakusta qullqiyuqta chaypaqmi quwita iskayta nakan wallpatapas chayna iskayta nakan. Wallpa quwita marqaqkunaman tiyachipunku.
Kasarakuy punchawmi civil nisqantawan wakin kuskata ruwanku. Kunchichay punchawmi kasarakuqkunan qispimun Antawaylla llaqtamanta ayllunkunan paykunawan kuska. Wasinman chayatinkum arroz nisqanman chaskinku, aqata upyachinku chayamuqkunaman killikunapas achkam kan, banda nisqanmi kasarakuypi kan. Chay punchawmi ñawpaqta chayru mikunata mikunku chaymanta estofado nisqanta mikunku. Ayllunkuna kasarakuqkunaman regalo nisqanta qunku. Tukuy tutam tusunku upyanku kusisqa lliw chay kasarakuypi kaqkuna. Paqarisnintapas kasarakusqkunapa ayllunkuna wasinman rinku, chay punchaw mikunku kasarakuy punchaw mikuna puchusqanta hinallataq huk mikunaka yanunku, chay punchawmi kasarakuqkunapa waytanta panpanku hinaspa qawampi tusunku, tawtinchayay arpapiwanmi kan chaypi warmi takin.
About The Author
