Luzmila allin sipas kaptinsi, mikuyllapi kasqa, huk punchawsi, tukuyta mikurparisqa achikiyananmantapacha, tantataraq, upitutaraq, papa waykuta, mutita, achuyuqta, manas chaywanpas saqsasqachu, mamitansi nin yaw maykamañataq mikunkiri, hukchallatas hawas pikantitapas quñichispan mikurparisqa, chaywanpas aswan yarqaymantas kasqa, rantiqsi lluqsin wasinmanta miskikunatañas mikuchkan, mamitansi nin yaw ¿iman karun kunan punchawqa mikuyllapi kachkanki?, chaysi kamachitamusqa mamitan sipasmanqa, kunan punchawmi challwata tiqtirachikusunchik, rantimusaq, papatayá waykuruchkanki, hinallataq siwuyllata, tomatentinta, salsachata ruwaruchkanki, rantiparakamusqa kutimusaq, chaynata nispas warmillaqa, lluqsin wasinmantaqa llaqtaman.

Mamitanqa challwata rantispan kutimun wasinmanqa kay Kuripampa lawman, wasinman chayaruspansi sipastaqa rimapayan, wawansi manaña simiyuq kasqa, makillanwansi nin tusikuspa wiksanta llapchakuspa, chayqa riki wiksan sipasllapaqa punkirparisqa, ukchallatas, sipasqa manañas rimayta atisqachu, mamitansi yawar chunqata kutaspan qusqa, illpuykunsi, chay illpuchkaptinsi sipasqa wañurparisqa.

Mamallanqa, waqaspa nisqa ¿imapitaq rikukuniri?, qimiqllanpis tiyasqa sipaspa uma rutuqnin, marqaqnin, tantiyansi, pampanankupaq capillata, cajonnintinta rantimusqaku, qunqayllata velakunkupas, achkas kuyaqninkupas rikuriramusqa, waqaykunkus, sipasllamantaqa, allin yanapasuqniki karqa mamitay nispanku llakipayaymanta runamasinkunapas rimaykunku.

Luzmilaqa cajón ukupis puñuypihinas sumaq pachasqa kasqa, ñantas pisipay pisipas riykuchkasqa, hukchallatas purisqanpi sutkaykusqa pachanpas llikirparikusqa, qawakunanpaqsi, millay urukuna, chakintapas mikuykuchkasqa , qala chakillañas purisqa pisipay pisipay, ñankunata, manas, mayman rinanpaq allinchu kasqa, pisipay pisipayllañas, purisqapas, chay purispansi ñanpi tuparusqa huk warmiwan, hinaspas nin purillay, puriy, kay qatata chayaruspaykiqa huk taytakuchamanmi tupanki, hinaspa tapukunki mayninta wasikiman chayanaykipaq.

Purisqanmanhinas, puraminti istawsi sipas kasqa qala chakilla, manaña pachayuq, utqayllanñas aypan taytakuchata, tapukunsi, maynintan ñan richkan wasiyman, taytakucha nin mamitay allintan richkanki, wak qatachaman chayaruptikin sutilla, sutikimanta qayamusunki, chaytan uyarinayki, sipasqa chayarunsi, chay qatachaman, yaqa chawpi punchawtas manas pipas qayanchu, aswansi, huk simi niykamun, aman llulla kankichu, kasukunaykin mamitaykita, yanapanayki, llamkaysinayki, aman ñisutachu mikunayki, runamasiykita kuyapayanayki, taytachata kuyanayki, allin runan kanayki, aswansi anyaykachikun, chayta uyarichkatinsin qunqayllata raku simiwan sutinta qayarparikamun Luzmila, Luzmila, chaypichu kachkanki, ari taytay kaypin kachkani, mamitay manan qantaqa hayaykirayqchu, kutipuy wasiykita mamitaykin suyachkasunki lliw aylluykipiwan qunqayllatas Luzmilaqa rikcharparisqa, wañusqa kasqanmanta, mamitan, lliw kuyaqkunas mancharikusqaku.

Luzmilaqa mamitantas nin mamay ¿imatan ruwawachkanki? wañuranichu, ari chaymi velachkaykiku, sipassi sayarin mamitantas marqan, lliw kuyaqkunatapas, hinaspas nin, ñuqaqa kutimuchkani, taytachapa karu ñanninmantaña, manas llullakunachu, allin kawsaypis tiyana, ñuqa pantachkarqani, kananmantapachayá allin runa kasaq, kay ayllunchik qali kananpaq.

Tukupanapaq, manan imatapas ñisuta mikuchkanachu, hinallataq, allin kawsaypi kanapaqa, ama llulla, ama qilla, ama suwa, hinallataq qampas wawqiykuna paniykuna, aylluchik sumaq kawsakuypi kanapaqa, lliwmanmi yachachina allin yachaykunata.

¿Qué opinas?

DEJA UNA RESPUESTA

Por favor ingrese su comentario!
Por favor ingrese su nombre aquí

*