Kunanmi willakusqaykichik yachachiq Rolando Vargaspa willakusqanta, imaynam kay sumaq takinchik profesorita sutiyuq taki, paqarimusqanta.

Yachasqanchikhinam kay takitaqa, watan watan llapa yachachiqkunapa sapa punchawninpi takikunchik, manayá atiyllaqa chinkanqachu, wiñaypaqmi kay sumaq takinchik kanqa.

Yachasqanchikmanhinam, Huancaray llaqtaqa sumaq llaqtam, iskay mayuyuq; Huancaray mayu Antaraqra mayu, chaymantapas “zona maicera” “cuna de los negrillos” chay sutiwan riqsisqa.

Chay huknin Antaraqra mayuqa, hanay Cahuayna, Markachayuq wayqukunapiraq paqarimun, hinaspa hatun qaqanta, Occocho llaqtapa waqtanta, puka puka urqunta qamuspa, Huancaray mayuman chayamuspa, hukllaña Pampas mayukama rinku.

Chaymi kay mayuqa sapa paraykuptinqa ñisu ñisuta puririmun, rumikunatapas punrunyachisparaq, ñawpa pachapim, yaqa yaqalla Huancaray llaqtata aparqa, Quinta Córdova chakratapas yaqaña apayta tukuruchkanña.

Puka puka urqu tuñiykamuptinqa, mayuqa pukay puka chayaykamun, hinaspapas Huancaray mayuwan tariykanakuspanqa, pukaman llimpirparin, chaymanta hukllaña pukay pukaña rinku.

Chaypas chayllachu, Antaraqra mayuqa, llapa huancarinokunapa munasqanmi, usyay mitapiqa, llapa patanmi sumaq rumi rumillaña, pukay pukacham aqunkunapas, hinaspapas llapa waynakunapa, sipaskunapa, kuyakuqkunapa rinanmi.

Sapa chisinpay, sapa tuta killa killapim, kuyanakuq, wayllunakuq parisnintin chay Antaraqra mayu pataman rinku. Maqtachakunapas, pasñachakunapas wiñasqanmanhina chaymanqa richkankuña, sapa tuta chunniq qasilla kaptin. Kunankamas chaynallam.

Chaymi, waranqa isqun pachak suqta chunka tawayuqpim, (1964) Andahuaylaspa punchawnin asuykamuchkaptinña, llaqtanchikpa kamachikuqkuna llapa yachachiqkunata llallinakuyman minkakusqa, sapa llaqtamanta tukuy yachayninkuta semana de Andahuaylas raymi nisqanman apanankupaq.

Hinaspam, chay wata Huancaray llaqtapi llamkaq yachachiqkuna, chisinkuymanta tutakama huñuykanakuspanku, tukuy llaqtanchikpa yachayninkunata llamkayta qallarisqaku, Andahuaylasman apanankupaq.

Chaymi kay llaqtapa yachayninkunata apasqaku, wasi wasi, negrillo tusuy, belleza huancarina, kikinkupa musuq taki rurasqankuta ima.

Chaymi kay mayupi hamutaspakum, Huancaraypi yachachiqkuna llapanku huñuykanakuspanku

kay sumaq harawi qillqakunata qillqasqaku.

Pikunataq chay yachachiqkuna karqa: yachachiq Rolando Vargas Cevallos, Juan García, Miguel Ángel Pregúntegui, paykunam chay sumaq harawi qillqakunata qispichirqaku, “La venida del Antaraqra” sutiwan sutichaykusqanku.

Lliw llapa qillqayta tukuruspakuña, tapupakuspanku, kunan pitaq takiq kanqa nispanku, chaymanta takiqta maskasqaku. Hinaptinmi Mullipata yachay wasipi tarikusqa, yachachiq mama Reynalda Malpartida sutiyuq, paymi tonada, melodía nisqanta churasqa, hinaspapas paytaq ñawpata takiyta qallarisqa.

Kunanpunim kawsakuchkanraq yachachiq tayta Rolando Vargas Cevallos, Juan de Dios Garciapas, ichaqa Mama Reynalda unayna wataña wañukusqan, qaynalla tayta Miguel Ángel Pregunteguipas wañukun riki.

Chaymantañam kay llapa llamkasqankuta tukuspanku, Andahuaylas paqarimuynin punchawpaq apasqaku, tawa yachayninkuta: wasi wasi, negrillo, belleza Huancarina, kikinkupa musuq taki qispichisqankuta.

Chaymi Huancaray yachachiqkuna llapachan llallinakuypi llallimusqaku.

Chaymantam “La venida de Antaraqra” takiqa, llapampa simimpi karqaña, llapa runakunapa, warmikunapa, sipaskunapa takikuyninña, hinaspapas ancha allin riqsisqaña karqa.

Yachasqanchikman hinataqmi, waranqa isqun pachak suqtayuq watapiñataq “Trio Los Campesinos” rikurimun, Atilio Montesinos, Wilfredo Quintana, Jorge Nuñez del Prado, sutiyuqkuna.

Qipa watakunañataq, limamanta chayaramusqa Talavera de la Reyna llaqtaman Wilfredo Quintana, musuq takikuna maskaq, chay Sello Virrey disquera nisqanpaq chiqunanpaq. Hinaptin tuparusqa, hatun allin takiq, allin guitarra waqachiq Lido flores masinwan, chaysi tuparuspanku huk upyana wasiman guitarra hapiykukusqa risqaku; chaypi tapusqa, wawqiy qamqa yachachkankichiki musuq takikunata, manachu takiykuwaq nispa.

Hinaptin Lidoqa nin, Huancaray llaqtapin kay takichata uyarimuni, takiyta qallaykusqa “La venida de Antaraqra” takita. Tayta Wilfredo Quintanaqa, musuq sumaq taki kaptin, upallalla tayta Lidopa mana musyakusqanpi, pakaspalla grabadora nisqanwan chiqurusqa.

Chaymanta, Jorgewan, Wilfredowan huñuypanakuspanku, llapa qillqayninta tikrarparinku “La venida del Antaraqra” sutinta, “Profesorita” nisqanwan suticharuspanku chiqurunku.

Sichum kay taki, chay Asociación Peruana de Autores y Compositores (APDAYC) nisqanpi

qillqachinmam karqa, manayá kay sasachakuy kanmanchu karqa. Manapuniyá chay taki patintasqachu kanman karqa.

Llapanmi chaytaqa yachanku, chaymi tayta Wilfredoqa tapuptin nirqa, ñuqapam chay takiqa Huancaraytam taytaypa masin pukllaq apawarqa, chaypim huk sumaq yachachiq sipasta kuyakurqani nispan, manaya chayqa chiqapchu.

Wañukunanpaqñan tayta Wilfredoqa chiqap kasqanta willakurqa, chay taki Huancaray llaqatapi paqarimusqanta. Llapanchikmi yachanchik, rio de Andahuaylasqa kanchu Andahuaylaspiqa, río Chumbaomi mayunchikqa.

Kaynam kay taki.

LA VENIDA DEL ANTARAQRA

(Taki)

La venida del Antaraqra

Casi casi me ha llevado

Una linda profesorita

En sus brazos me ha salvado

 

Antaraqra es el río

Testigo de mis amores

Al verme llorar llorabas

Al verme sufrir sufrías

 

En las playas del Antaraqra

Me juraste quererme siempre

Pasaron días y noches

Pero el juramento te olvidaste

 

Magestuoso Huisaynizo

Testigo de mis amores

Al verme llorar llorabas

Al verme sufrir sufrías

FUGA

Naranjatari suyallawaqchu

Yurachallampi qilluyanankama

Ñuqam isusi suyankimanqa

Limachamanta kutimunakama

¿Qué opinas?

DEJA UNA RESPUESTA

Por favor ingrese su comentario!
Por favor ingrese su nombre aquí

*