Mama Teofilan nirga Uripa llaqtapi kay waka qiruytaqa rurarqakum, kawsaykuna taqina ukupi wakakunaqa lliw ayllukunapa, urqukunamanta qampumun uywakuna,panqakuna, sumaq qiwakuna mikunankupaq, chaypim waka markayqa qallarin muyuqllapi ayllukunapi ayniykanakuspa.

Wakakuna markaytaqa ruwanku mana uywakuna chapukuspa pantachikunampaqmi utaq mana maskaypi ñakarinapaq, chaynapi allin kawsaypi kusisqalla kawsanankupaq.

Kay markaytaqa rurankum kanchumpi utaq kural nisqankupi kaspikunamanta utaq kichkawan qinchasqapi.

Kay Uripa llaqtapin waka qiruyta ruwasqaku sumaq sumaq kusikuyta, kay raymitaqa rurasqaku chawpi aymuray killapi, chaymi llipin uywayuqkuna qampun qatusmanta, llaqtaman qachukuna mikunampaq, chaypim qallarinku qiruyta, chaysi sapa ayllupa qirun kasqa.

Chay quñupim akllanku padrillerota hinaspa madrillerata, padrilleron wakakunata qirunqa chay san Gabriel nisqanwan (qiru), madrillerañataqmi cintata tukuy llimpikunata churasqa wakapa rinrinman, hinaspa rinrinta kuchun, chaymantam qachinqa akupata; chaynallataqmi waqrata pukuyta qallarinku ancha kusikuywan hinaspam wakakunata lasumuspan markanku. chaymi waka katinqa qirunku siki chakampi hinaspan rinrinpi cintata churanku, sichus turu katinqa qirunku rikrampi.

Puntataqa qallarinku, apukunaman, mamapachakunaman saminchaspamkun (paqapa) chaypin churanku: rurukunata, kukata, Traquta, tantata, gaseosa, cigarrota hinallataq sumaq waytakunata; chaykunata ruraspankun warakanku utaqmi pampanku allin raymi qispinampaq.

Sumaq kusikuywanmi kañasuta upyanku tinka tinkarispan, kukatapas aku akurispanku, apukunatam yupaychanku “apu ayawita, apu riwinata hinallataq apu Maria pittyta” allin uywakunata waqaychanampaq, mirananpaq, hinaspa mañakunku lliw ayllukuna ancha sumaq kawsakunankupaq, chaywanpas kukakunata allpakunku, allin kallpawan qallarinankupaq.

Markay qallarinanpaqmi waqrapuku qallarin pukuyta, chaynallataqmi qiruqa quñirichkanña ancha sansapi, ninapi. chaymantataq padrillero hinallataq Madrillera wakapa yawarninta upyanku (kayqa wakakunapa yawarninmi, llipin kurkuchayman yaykuykuchun nispa) mana manchakuywan wakakunata markanampaq, utaq rinrinkunata kuchunanpaq. Ña chay qiru ninay-ninay kachkaptinqa wakatam lasumunku hinaspan chay achka runakuna chakataspa pampaman saqtanku; chaypim padrillero asuykun ninay ninay San Gabrielta (qiru) aptaykukuspa, chaypim siki taqrampi siqin, sichus turu kaptinqa rikrampim siqinku. Madrillerañataqmi cintata aritichin llipin wakaman, hinaspam kallpin rinrinta, chaynallataqmi akupatapas lliw kirinman chaqchupan.

Chaymanta tukuruspankun qallarinku uywakuna suñayta sapa warmankunaman, anchata anyaspan hinallataq latiquspanku, kaynata nispa: kunanmanta allintam nanachikunki mana yarqaymanta wañuchispa uywanki.

Chaynallataqmi upyanku tasnuriq aqa sarata, achitasapata pusuquriykuchkaqta, kaynata rimaspanku: “kayqa wakapa lichimmi”; tuqraytañataqmi mikunku quwi kankata, kumun kulista, wallpa chupita hinallataq qanka miskipayuq (kisuyuq).

tukunanpaqñataqmi wayqachita ruranku: rurukunawan, tantakunawan, gaseosawan hinaspam sapa wakakunaman wayqachinku. chaynallataqmi huk wakiraman qatiykachinku, allin qumir qachu kasqanman, chaypin wakira urqukun chay wayqachita mikukunampaq. Chaynallataq raymi qatinampaq, chay sapa rinri wakakunapa qurusqankuta paqapanku.

Aswanyá kay waka qiruyqa raymichakuy sapa suyukunapi, lliw ayllukunan churapakunku, chaytan yachachina wawanchikkunaman, paykunapas yachachinqa riki kawsaqchanpi wawankunaman, kay yachaykuna mana chinkananpaq, hinallataqmi yachaywasikunapipas rimariytan atinku hinallataq qillqaytapas, kay yachayninchikkunamanta.

¿Qué opinas?

DEJA UNA RESPUESTA

Por favor ingrese su comentario!
Por favor ingrese su nombre aquí