TUKUYMI UTIN

0
166

Kay Coronovirus qallarishanmantapacha, lliw runakunapa ruwayninkunan utinña yaqa kay insqum killapi, wapatapas, muyuchkanñan, ruwasqanchikqa manayá qawakuchkanchu: aswanmi wawakunapa, yachaqkunapa, hinallataq yachachiqkunapapas, ñawin, sikin utirparinña, tiyasqankupi chay computadora, lapto.tablet, celular qawasqankupi, tukuy ima yachaykunata.
Musuq watapipas, hinallan kanqa, manam kanankama kanchu ima hampipas kay unquypaqa, chaynatan willakamun umalliqkuna kay Peru suyunchikmanta, hinallataq, willakuqkunapas; chaytan kay MINEDU ukumanta kamachikamunku, lliw yachaykunaqa apakunqa kay watahinapi, hinallataqsi, wakinkunaqa, yachaykunata uyarinqaku, iskay, kimsa kutita yachaywasiman rispa, chaypaqmi yachachiqkuna mana muñachkankuchu, kay unquymi astawan chiqirunman lliw runakunaman.
Sapa wasipin tukuy imata ruwaspanku, taytamamkuna yanapachkanku warmankunata lliw yachaykunata, atisqankumanhina, hinallataqmi wakin ayllukunapiqa taytamakunaqa astawan, warmankunata tiyaspanku uyaritin yachaykunata, astawan maqanku, pananku, yaw warma ¿imatam tiyarayanki tukuy punchaw chayta qawaspa? ¿Manachu yanapakuwaq ruwayllapipas? Chayqa manayá allinchu.
Kay punchawkunan UGEL wasimanta aypuyta qallaykunku maytukunata, rapikunata, lliw yachaywasikunaman, musuq watapi warmakuna ñawinchanampaq, aswanyá kananmanta pachayá chay aypusqankuta chayachinmanku warmakunaman, chay samayman yaykuptinku ukaqnin punchawllapipas likanankupaq, utaq ñawinchanankupaqpas.
Sapa suyumantan lliw umalliqkuna mana allintachu churapakuchkanku, kay yachaykuna chaninchakunanpaq, paykunan yanapanmanku chay internet mana kuchukunankupaq, hinallataq wakinnin mana imapas kaptin chay radio, televisión chayta churanmanku lliw kay llaqtamasinchankuna yachanankupaq.
Sapa wasipin qari, warmi yachaqkuna kachkan, lliw ayllunchik sumaq kawsaypi kananpaqa, yachayninchikkunatan chaninchana, hinallataq taytamama yanapayta atinan, warmakuna allinta qispinankupaq, allin yachaysapachallaña kanankupaq; amayá nisunchu tukuymi utin, utispapas, paykunaqa yachachkankun, amañayá munasunchikchu paykuna ñawsa kanankuta, aswanmi qatipana, yachachiqkunata tapuna ¿imaynatan warmay yachachkan? Chayta ruraspaqa, allintan ruwachkanchik. Lliw runakunan qispinanku sumaqta, kay llaqtanchik kallpanchakunanpaq, chayna katinqa, ayllunchikmi wichayman qispinqa, kay allin kawsaypi, chayna kachun, huk punchawkama.

¿Qué opinas?

DEJA UNA RESPUESTA

Por favor ingrese su comentario!
Por favor ingrese su nombre aquí

*