Qichwapis tiyasqaku mamakucha taytakuchantin, paykunapas kasqa misin, allqun. mamakuchas upa kasqa. Chaypis, yachasqanchikmanhina ñawpaqtaqa mana akchikunapaq imapas kasqachu, hinaspapas yakupas, upiyanapaq manas kasqachu, pukyalkunamanta yakuta upyarqaku. hinallataq paykunaqa yanukurqaku allpa mankallapi yantawan.

Huk tutas mamakuqa utqayllamanña yaku apamuq risqa wasimpaq waklawninta, chaypi riki tuta kaptin mana imatapas rikurqachu, ukchallatas hampatu puyñun ukuman wichiykusqa. mamakuñataq sara lawata yanukusqa, chaypi hampatu timpukusqa lawapi, yanuyta tukuruspanñataqsi taytakunman puntata qaraykusqa, chaymanta misinman, allqunmanwan chaysi taytakupa latunpiraqsi hampatuqa hatirukusqa chay taytakuqa nisqa mamakuntaqa: ¡mamay!, wallpachaykita nakarusqanki, añaw miskim kachkan, mamakuñataqsi nisqa upakayninwan ¡aw!. taytakuñataq miski miskitarasqsi mikuykusqa, allqupas miskita mikuykun, misillañas mana mikusqachu, patachankunallata lluspispa manaña mikuyta munasqañachu, mamakuñataq nisqa imaynañaya kay misiqa karunqa mana mikuspaqa, rachiyarunqa, manachayqa wañunqapascha

Chaymanta lliw puñurpaptinkus misiqa, mikuna mana mikusqanta hawaman apasqa, chaypi allqu misita rikurpaspa, nisqa: maymanmi apachkanki mikunata, misiñataq nisqa: imatan qanman qukusunki ñuqachiki yachakuni mayman,piman apayta nispas niykusqa allqutaqa; allquqa chaynata niykuptinsi pasakusqa, misiñataq wasi hipaman pasarpasqa, chaypi atuq misita suyasqa, chay misiqa mikunanta huykusqa atuqman. Chay atuqqa misita niykusqa: ¡añañallaw! ancha ancha minkim kakusqa kay mikunaqa nispansi atuqqa mikuykun, chaynas sapa tuta misiqa mikunata apasqa atuqmanqa.

Hinaspa achikyaruptinsi mamakuqa chisi tuta mikunallantañas huñiykachisqa, taytakunmanqa haraykusqaña taytakunqa miskillatañas mikuykun, hampatuyuq mikunata, taytakuqa tukuruspanqa mamakuntaqa niykusqa: ¡mamay! miskim mikunayki kaykuchkan nispas, mamakuñataq nisqa: ¡yaw! yapamusqayki, taytakuñataq, ¡ari mamay!, kaqmanta mamakuqa yapankichu, ¡yapasaqmi mamay! nispa taytakuqa, mamakuñataq mankantapas taqraqyaykachichkanñan, taytakuñataq yapaytaraq munaykukun, misiwan atuqwampas chayna sapa tuta.

Huk punchawsi mamakuman lecheta huykamusqaku, mamakuqa nisqa; kay lechewanqa apichatacha ruwarparisaq, mamakuqa wasinman kutisqa; wasinman chayaruspansi, mitumanta mankantas churkuykusqaña manaraq tutayamuchkaptin, mamakuqa yanuykusqa, qaspi qaspitaqa taytakupas chayarpamuspas, mamakutaqa nin; ¡mamay mikunachaykita haraykamuway!, mamakuñataq haraykusqa, taytakuñataq miskillatañas mikuykun leche apitaqa.

Chay misiman, allquwanmanpas haraykusqa, misiñataq patachankunallatas lluspiykuspa, manaña mikusqañachu, lliw puñuqña pasarpaptinkus misiqa kaqmanta, leche apitaqa atuqman apasqa, atuqa mikuykun miskillataña tukuruspanñataqsi misitaqa niykun, manachu yapaykuwankiman, misiñataq kaytaqa kachakanmi manam apamuyta atimuymanchu nispansi misiqa niykun.

Atuqñataqsi mikuyta musnaspa, misita nisqa, aparuway chayllapiña mikuramunaypaq atuqa nisqa; misiñataqsi wasi ukuman atuqtaqa apaykusqa, mankata misi hawaykachiptinsi, atuqa mikuykun mana samaykuspaña, uku mankapa sikinman manaña haypaspa atuqa umantaña mankaman satirpasqa.

Chayna mikuy mikusqampis uman manas lluksiyta atisqachu mankamanta, chay misitaqa nisqa yanapaway kaymanta lluksiyta munani, misiñataq imawantaq yanapasqayki, atuqñataq kaspita apamuway nisqa, misiñataq ischuchatas huykusqa, ¡kaspita nikim mana ischutachu! atuqa misita nisqa, kunan rumita apamuway nispas atuq misita nisqa, misiñataq kuchipa akanta huykusqa, atuqñataq rawyaytaña hallaykuspa, misita nisqa, rumita hapiykachiway nisqa misita, misiñataq hawaykachakusqa rumita maskaspa, chay rumitaqa rikuruspansi atuqtaqa misiqa apasqa rumikama, rumita hapiykachiptinsi atuqa umampi mankata waqtarpasqa, taytakuñataq hapariyta hallaykusqa ¡ananaw! ¡ ananaw ! ¡ananallaw! ¡imam chay!, waynaykichu pin chay nispas taytakuqa mamakunta niykusqa, mamaku hatarispas, ninata rapuchisqa, achkipi taytakuta hawaykuptinsi yawarllaña umayuq kaykuchkasqa.

Taytaku hawaman lluqsiptinqa manas pipas kasqachu; chay lluqsinankamaqa allqu atuqtaqa pawarpachisqaña, atuq raskiy raskisqampi, chakin pantaykusqa, chaypi atuqa qaqa ukuman wichiykuspa wañurpasqa, chaymanta pachas misiqa manaña rikusqañachu atuqtaqa, chaymanta pachas misi allquta chiqnisqa atuqta wañurachisqanmanta.

¿Qué opinas?

DEJA UNA RESPUESTA

Por favor ingrese su comentario!
Por favor ingrese su nombre aquí