ILLAQMANTA

0
72

Huk punchawsi musuqa, yunka wayquta llamkapakuq risqa, kutimuspan chay llamkapakamusqan qullqiwan warmi maskakunanrayku; risqanpis qispirusqa yunka wayqu qasa patamanqa, chaypis tuparun huk mistiwan silla kawallunpi sallanyallaña qamuchkaqwan, maytam rinki yaw maqta ninsi mistiqa, llamkapakuqmi taytay nispa kutichin, kusa chaynaqa ñuqataya llamkapakamuway nispas nin mistiqa, ¡ari ari taytay! Kusirikullansi musuqa.
Ñam qispirachinchikña rimarisqanchikta, chayna kaptinqa samariqhinaya casinopi pukllaykusun ¡yachankichu pukllayta! ninsi mistiqa, arí imas manari yachaymanchu taytay pukllasun nispa kusisqa musuqa, chay pukllaypis lliwta llalliparusqa musqa qullqinta, kawallunta, arqinanta ima, hinaptinsi mistiqa nin allinmi lliwmi llalliruwanki ichaqa kanmi kimsa warmi churiykuna sichus kunan llalliruwanki hinaspaqa chawpikaqtam kasaranki ichaqa ñuqa llalliruptiyqa lliw llalliwasqaykitam kutichipuwanki, chaynam kanqa ninsi musuqa, nispaqa chaytapas llallirullasqataqsi.
Mistiqa ninsi, kunanqa kawalluykitapas, arqinaykitapas, mañayllaña mañaykuway wasiman chayaspaqa huykapusqaykim nispa, arí ninsi musuqa, chayllas utqayman ichikuspa qaku nispa sallanyallaña wischurpartamun musutaqa, utqayllañas yupiwan hipanta riykullan, chayna rillaykaptillansi intipas wasaparunña llakiwanñas maypitaq puñusaq pimantaq samasaq manchachikupas mikuwanqachiki tutaqa sapaytaqa nispas, aswanqa huk qasapatachaman qispiruspas waqtanpapi akchi akchiqta rikurusqa, pawayllas waqpiyá samapakamusaq nillaspan puririn, qampullayki ñuqallaymi, pillam mayllam yaykukamuy taytay ¿imallay qaykallam? nimunsi huk payacha, ñuqallaymi mamay samachillaway nispas mamakumanqa musuqa yaykun hinaspas lliw iman pasasqanta willarusqa, payachataqsi chayta uyarispan utqaylla mikunanta qaran, hatu hatun paylakunapis aychata yanuykuchkasqa chaymantas aychatapas challpaykun, ichaqa ninsi payachaqa manam samachikimanchu wawaykunam llumpay piña, ñam chayramunqaña utqay mikurukuspayki ripukuy, musuqa llakirikunsi maytas kay rayma pachapiña riyman manchakunim nispa, payaqa uyarayasqanamntas nin chaynaqa yaykumuy wasi ukuman hinaptin payla ukupi paqtarusqayki mana wawaykuna musyasunaykipaq nispa, chaytapunisa ruwarun.
Chayñas mamakupa wawankunaqa chayarqamun sapapapallaña chayqa kunturkuna riki kasqa wawanqa, utqayllas mamanqa mikunata qaran, allin chawpi mikuypis huknin nin mamay imam chay asnamuwan nispa, imataq kanmanri waway qawkalla mikukuy ninsi mamanqa, hukninkaqpas ninpunitaqsi ñuqatapas asnamuwachkanmi nispa, chayñas mamakuqa willan waqarikuspan musupa llaki kawsayninta amayá mikurullaychikchu llakipayaypaq illaq musutaqa nispas payachaqa pituchakullan. Chayllas payla ukumanta urquramunku musutaqa, kunturkunaqa ninsi musumanqa chay mistiqa tiyan wata puriypim manam chayawaqchu nispa, ichaqa illayta urqupi nuwilluta lasurapamuwayku hinaptinqa aparusqaykikum purikuqhina, chayta uyarispas musuqa arí chaytaqa ruwaramusaqmi ninpacha ackikyaytaqa ñas musuta kunturtunaqa urquman qipirparinña, waputas musuqa yachasqa lasuytaqa, chayllas allinnin nuwilluta qapichaykun, kunturkunaqa saksaypata mikuykuspas musutaqa maymikaqkama qipirparisqaku….(Meza, J. 2020).

¿Qué opinas?

DEJA UNA RESPUESTA

Por favor ingrese su comentario!
Por favor ingrese su nombre aquí

*