Yaqa kinsa chunka qipa watakunapis, ganaderokuna wakin waka, turu rantiqkunas, purisqa lliw ñankunata kay Apurimaq suyupi, chaypin sapa risqankupi, tupasqaku millay condenadokunawan, chaysi sapa samaspanku tapukunku chayaspanku llaqtachakunapi tiyaqkunata ¿Imatan yachanku kay condenadomanta? Manas pipas rimayta munasqahu.

Wakin runakunas manas, munasqakuchu rimayta, manchakuymanta, hinallatas musquyninpi rikuriramutin, mana chayqa chay hamutayninpi, umanpas tinpuykunman, lliw kurkun katataymanta qunqayllata tusuykunmansi, chayta nispankus mana pipas munasqachu rimayta kay condenadokunamanta.

Pedro llaqtanpi riqsichikusqa allin ganadero kasqanta, hatun kallpasapa runa rakullamanta rimakuq, makinhinatas riqsisqa tukuy ñankunata, chaypis illasqa Pariabamba llaqtata, chaypis rantirparisqa yaqa chunka iskayniyuq turukunata, pisi qullqillapaq, allillamanta qatimusqa kay turunkunataqa tukuy tuta, qunqayllatas wayqupi ñataq ñataq achikyamuchkatinsi turukuna takanakuyta qallarirparisqa ¿imayna, pisipasqa turukuna, takanakunmanchu? ¿imatacha rikurunku? yanapaqninwansi rimanku, ¿imaya kachkan kay wayqupi? sunquypas taytay Pedro hukmanmi kachkan.

Kay Kaskapampa wayqus kasqa manchakuypaq, Pedropas nin yanapaqninta, ¿iman kachkan? ñuqapa wasaypas, qasquypas chiri, chiri kachkan, rupapakuytan munachkan, umaypas nanaytan munachkan, katataymi quwayta munan, kay qipachata qawaykusaq, ¿imachiki chaypi kanman?; Pedro hukchallatas qawarparisqa hatun uqi kuchita waqrayuqta, mamallaymama, ¿imatan rikurparini?, manchasqas kutin, José runansi nin taytay ¿imatataq rikurirparimunki? hatun kuchi waqrayuqmi puñuchkan miskillataña, sapa waqranpin kachkan llipllipyaq chaskahina, hatun kuchin yaqa iskay turu sayaykunan kachkan.

Runan Joses nin taytay Pedro kay condenadoqa pisipasqacha puñuchkan, imamantachiki tukuy tuta purirqa, wakinmi tikrakun kawramanraq, kuchiman, allquman, asnuman, runamanhina, ima runachiki karqa, mana allin wañusqakunan chayna purín tutalla manchakunapaqhina, awichuymi niwarqa chay condenadota rikuspaqa, taytachata mañakuspan kaytan apamurqani taytay Pedro upiyachaykuy, chay kurkuyki manaña katatananpaq.

José aywaykusqa puqusqa ispayta, yaqa watantinsi puquchisqa, chaytas upiyananpaq apakusqa, mana millay wayrakuna, urqupas mana qayqananpaq, hinallataq mana ima condenadokunapas manchachinanpaq wayqanpi apakusqa tinkaspa illpukunanpaq, Pedro malliruptinsi, qatqi kasqa imataq kayri, puquy ispaymi taytay, chayllaraqsi kurkun allinyarparisqa, chaymantataq utqayllamanña turukunata mutkiykachin kay puqusqa ispayta mana waqranankupaq, chaynallata ruwaspankus kay wayqutaqa lliw turukunata chipachisqaku, condenado puñunankama.

Ñas wasinkuman chayamuchkatinku, wayras, parantin qunqayllata chayarparisqa hinaspas nuqnuynuqnuta Pedro, José turuntinta kay paraqa apirparisqa, ña tutayaykuytas, chaypis nin José Pedrotaqa, condenadoqa, rikcharunñan pawakachaykuchkanchiki, aswanmi ñuqanchiktaqa mana musiyawarqanchikchu.

Pedro nin kananmanta pachayá kay sillwiypi apakunay, puqusqa ispayta, kukachayuqta, qatqita, pitanata,imapas katin chaykunata upiyaspa, qusñichispa imatapas manchachinapaq, hinallataq taytachata mañakuspa, sumaqta maymanpas chayanapaq, chayllaraqmi sunquy tiyachaykuchkan, ichayá puñuptiy mana musquyniypi rikurinmanchu chay condenado, José nin manan rikurinqachu, chillmiykuspaykiyá taytachata mañakunki mana chay kananpaq.

Tukupanapaq, achkan tukuy ima rikurin ñankunapi, chay kaptinqa, allin sunquyuq kaptikiqa, allinmanmi chayanki, aswanya taytachata, mamapachata mañakuspaqa allin kawsaypin kanayki maymanpas, kaymanpas rispa.

¿Qué opinas?

DEJA UNA RESPUESTA

Por favor ingrese su comentario!
Por favor ingrese su nombre aquí

*